Hin en dr Nacht zom Trachtafescht,
12 Stonda en da Bus neipresst.
Friahmorgens im Camp dann okomma,
Frühstück ei’gnomma!

En Grömitz schtoht des Jugendcamp,
des isch do, wo d’Jugend (net) pennt.
Se hausat en Zelte ganz kunterbunt
gmischt ond durchanander – isch des xond??

So quasi mitta en dr Nacht
hend se ällweil für on scho ’s Frühstück gmacht!
Dia Auga waret no net recht offa,
hend mir scho onsern Kaffee gsoffa.

D’ Jonge waret em Hansapark
ond fandet des au ziemlich stark.
Achterboh’ ond Karussell,
oimol langsam, oimol schnell.

Wenn der Wind net gwäsa wär,
hättet badet mir em Meer.
Doch der hot blosa ons – saukalt
drom hemmr’s lassa halt.
 
’s Wasser, d’ Oschtsee ond dr Sand,
’s hot älles geba dort am Strand.
Liabr ens Café zom Tino
ond ’ma warma Cappuccino!

Freitag Obend no schnell a Prob’,
hend älle mitdoa: Dickes Lob!
Schla’ me ’s Blechle, jeden Tag
ging ’s Programm no Schlag uff Schlag.

Ons wars überhaupt net fad
an dera Uferprommenad.
Danzet hemmr ond au xonga,
s Fescht’le isch ons ganz guat glunga.

Onser Ufftritt am Strand en Dahme
war wirklich allererste Sahne.
Da oi oder andre Patzer hemmr ghett
Aber des verzähla mr natürlich net.

Seemannsmärsche ond au Liader
hemmr xonga – emmr wieder -
zom Feschtzug wars, des isch doch klar,
ond d’ Sonne dort en Grömitz war.

Jedoch wars kalt – hoißt inna hoiza,
mit Glühwein besser wia mit Woiza!
Derart betankt konnts weitergeh’,
des Fescht geniessa – oifach schee!

Mit dem Schiff nach Dänemark,
Herrgottsdonder war des stark.
A super Party uff dem Kutter
ond überhaupt koi Fischlesfutter.

Blosa hemmr, ond au druckt,
danzt ond plattelt wia verruckt.
D’ Sonn hot g’schiena uff da Ranza
ond mir hend lassa d’ Puppa tanza.

‘s Dichta hen mir em Erwin (Busfahrer) überlassa,
aber koine Vers’la, dr Bus hot DIESEL glassa!
Zwangspause war’n so 2-3 Stonda
ond mir hend Zeit zom Dichta gfonda.

So, liabe Leit, was Ihr jetzt lesa
isch onser Fahrt nach Grömitz gwäsa.
Ond was mir jetzt net dichtet hent,
des isch au net für euch bestemmt.

Jetzt isch Schluss ond jetzt isch Aus,
die Dichter waret: „’s Hinterhaus“.